Tusagassiorfitsigut aammalumi inuiaqatigiinnut avammut saqqummiunneqaqqammerpoq aalisarneq pillugu ataatsimiisitaliarsuup suliaminik killiffia.

 

Tamannalu tunngavigalugu Aalisarnermut Piniarnermut Nunalerinermullu ataatsimiisitaliamiit isumaqarpugut Naalakkersuisut neriorsuutigisarsimasartik, tassalu inatsisartuni ataatsimiisitaliaq akisussaanerpaaq kiisalu inatsisartut sinnerisa akuutinneqarnissaannik neriorsuisarnerit eqquutsinneqarneq ajornerat pissusissamisuunngilluinnartoq.

 

Aalisarneq pillugu ataatsimiititaliarsuup suliaminik saqqummiussinissaa sioqqullugu Naalakkersuisut Aalisarnermut Ataatsimiititaliaq siullertut saqqummiiffigissallugu neriorsoramikku aamma eqquutsinngilaat. Inatsisissaq isertuussamik suliarineqarsinnaanngilaq.

 

Inatsisissaq imartoqaaq, pisariaqarpoq inatsisiliortut inatsit pillugu qaammaasaqassutsimikkut piareersimallutik suleqataanissaaq Naalakkersuisutigoortumik aamma isumannaarniassallugu. Inatsisissaq aalisartorpassuarnut inuussutissarsiutinillu ikinngitsunut tunngassuteqartoq annertooq piffissaqarluarluni Inatsisartunit sammineqartariaqarpoq.

 

Aalisarnermut Piniarnermut Nunalerinermullu Ataatsimiititaliap naliliinera naapertorlugu Inatsisartunut ilaasortat paasissutissanik tamakkiisunik pissarsinissaminnut, aamma ataatsimiititaliami susassaqartumi sulinissatsinnut piffissaliussaq annikillereerpoq.

 

Paasisassarsiorsinnaanerit aamma nunatsinni pissutsit kisiisa samminagit nunatta avataani niuernikkut sunniuteqarsinnaanera innarlerneqaqqunagu ilisimasassarsiorsinnaanerat assut piffissakilliorfigineqassapput.

 

Ataatsimiititaliap maanna Naalakkersuisunut sakkortuumik inassutigaat aalisarneq pillugu ataatsimiititaliarsuup suliai tamaasa ataatsimiititaliamut matoqqasumik saqqummiuteqqullugit. Suliat annertuut pingaaruteqartullu Inatsisartut ataatsimiititaliaanut susassaqartumut isertuunneqarsinnaanngillat. Inassutigaarput Aaalisarnermut Piniarnermut Nunalerinermullu Ataatsimiititaliaq suliap imarisaanik matoqqasumik piaartumillu saqqummiiffigineqassasoq. Tamannami maanna ukioq ataasinngulersumi neriorsuutaasarsimasup sulili timitalerneqanngitsup piviusunngortinneqarnissaa piumasarigatsigu.

 

Naalakkersuisunut ilaasortat neriorsuutiminnik eqquutsitsisannginnerat akuersaaginnarneqarsinnaanngilaq, piumasaraarput neriorsuutigineqartut maanna isumannaarneqassasut.

 

Aalisarneq pillugu inatsisissaq inuiaqatigiinni isumaqatigiiffiusumik naleqqussarneqassappat isertuussineq toqqorterinerlu aqqutiginagit ammasumik suleqatigiittoqartariaqarpoq. Isertuussilluni aqutsineq ingerlatsinerlu maannangaaq unittariaqarput suleqatigiinnerlu aallartillugu.

 

Aalisarnermut Piniarnermut Nunalerinermullu Ataatsimiititaliaq naammagittarsimaqaaq suleqatigiinnermik pitsaasumik pilersitsisoqarnissaanik noqqaasarluni.

 

Naammagittarsinnaaneq killeqalerpoq Naalakkersuisut neriorsuutiminnik eqquutsitsisannginnerat akulikippallaamik naammattoorneqartartillugu.

 

Naaperiaaqqissaagulli, tassalu, aalisarneq pillugu ataatsimiititaliarsuup suliai tamakkiisut matoqqasumik Inatsisartut Aaalisarnermut Ataatsimiititaliaannut saqqummiunneqarnissaat Naalakkersuisut piviusunngortittariaqarmassuk.

 

 

Aalisarnermut, Piniarnermut Nunalerinermullu Ataatsimiititaliap siulittaasua
Henrik Fleischer

 

Annertunerusumik paasisaqarumagaanni ataatsimiititaliap siulittaasua saaffigineqarsinnaavoq ugguuna mobil +299 52 72 82