Arnat spiralilersuisimanermi misigisaminnik saqqummiussisut Ilaqutariinnermut Peqqissutsimullu Ataatsimiititaliamit tapersersorneqarput

Suliaq pillugu nunatsinni danskillu tusagassiorfiisigut kiisalu Peqqissutsimut Naalakkersuisumit allakkatigut ilisimatitsissutit pissarsiarineqartartut aqqutigalugit Ilaqutariinnermut Peqqissutsimullu Ataatsimiititaliami ilaasortat malinnaapput.

Ataatsimut isigalugu akuersisitseqqaarani naartunaveersaatitsilluni nakorsartittarnerit akuerineqarsinnaanngilluinnartut ataatsimiititaliaq isumaqarpoq. Suliap ingerlanerani paasinarsivoq 60-ikkunniit 1991 tikillugu peqqinnissaqarfiup danskinit akisussaaffigineqarnerata nalaani iliuuserineqarsimasut pillugit arnat katillugit 143-t danskit naalagaaffiat inuit pisinnaatitaaffiinik[1] unioqqutitsisimasutut eqqartuussivimmut tunniukkaat. Tamatumunnga atatillugu arnanut pineqartunut tamakkiisumik tapersersuinini ataatsimiititaliap nalunaarutigerusuppaa. Danmarkip Kalaallit Nunaatalu suleqatigiillutik arlaannaannulluunniit attuumassuteqanngitsumik misissuititsinerat maanna ingerlanneqaleruttorpoq[2], aamma 1960-ikkunniit 1991 tikillugu suliamik ilisimatuunik qulaajaasussamik suleqatigiissitamik pilersitsisoqarluni. Misissuisitsineq 2025-mi majimi naammassineqassasoq naatsorsuutigineqarpoq.

Taamaattorli naartunaveersaartitsinermi periuserineqartoq peqqinnissaqarfiup 1992-imi Kalaallit Nunaannit tigunerata kingorna suli ingerlanneqarsimagunartoq ataatsimiititaliamit maluginiarneqarpoq, ullumikkummi kalaallit arnartaat[3] akuersiteqqaarnagit naartunaveersaartillugit nakorsartittartut pillugit sulianik arlalinnik peqarmat. Arnat namminneq timimikkut taama misigisaqarsimasut nalunaaruteqarnissaat kaammattuutigineqarpoq. Suliat taakku nuna tamakkerlugu nakorsaaneqarfimmit isumagineqarput peqqinnissaqarfillu pillugu naammagittaalliuuteqarnissamut malittarisassat naapertorlugit suliarineqassallutik.

Arnat misigisimasaminnik suliarinninnissaminnut kiisalu taarsiiffigitinnissamut periarfissaqarsinnaaneq eqqarsaatigalugu ikiorneqarnissamut tunngasutigut assigiinngitsumik pineqarsinnaanerat ataatsimiititaliap tusagassiorfinnut taama nalunaaruteqarnermini ernumanartoqartippaa. Peqqinnissaqarfiup kimit akisussaaffigineqarnera apeqqutaatinnagu suliat tamarmik assigiimmik suliarineqartarnissaat Naalakkersuisut qulakkiissagaat ataatsimiititaliamit matumuuna kaammattuutigineqassaaq.

Mala Høy Kúko

Ilaqutariinnermut Peqqissutsimullu Ataatsimiititaliami siulittaasoq

Annertunerusumik paasissutissanik pissarsiniarnermi ataatsimiititaliap siulittaasua mobil +299 55 16 14-mut sianerfigalugu pissarsiarineqarsinnaapput