Inuusuttut Inatsisartuinik taallugu tullianik 2012-imi aaqqissuussisoqassaaq 

 

Inatsisartut Siulittaasoqarfiata ataatsimiinnerminni kingullermi aalajangerpaa tullianik Inuusuttut Inatsisartuinik taallugu aaqqissuussineq aatsaat 2012-imi ingerlanneqassasoq.

 

Inatsisartut 2003-miillu ukioq allortarlugu Inuusuttut Inatsisartuinik taallugu aaqqissuussisaraluarput.

 

2009-mi Inuusuttut Inatsisartuinik taallugu aaqqissuussineq sapaatit akunnerinik arlalinnik kinguartinneqartariaqarsimavoq aallaqqaammut peqataaniarlutik nalunaartut ikippallaaqimmata, aatsaallu piviusunngortinneqarluni peqataaniarlutik nalunaartut naammatsimmata. 2011-imi Inuusuttut Inatsisartuinik taallugu aaqqissuussinissamut piareersarnerit maannangaaq takutereersimavaat aamma maannakkut peqataanissamut soqutiginninneq annertugisassaanngitsoq.

 

Inatsisartut Siulittaasoqarfiata taamaattumik aalajangerpaa Inuusuttut Inatsisartuinik taallugu aaqqissuussisarnerup ilusia allanngortinniarlugu. Ukiut ingerlaneranni Inuusuttut Inatsisartuinut inuusuttut ilinniarfinneersut naalakkersuinikkullu suliniaqatigiiffiit inuusuttaannersut peqataasarsimapput. Siulittaasoqarfiup kissaatigaa siunissami Inuusuttut Inatsisartuinut meeqqat atuarfianni atuartut angajulliit peqataasorineqartassasut, soorlu aamma taamatut aaqqissuussisarnerup piffissaq sivikinnerusoq atorlugu ingerlanneqartalernissaa eqqarsaataasoq. Maannamut aaqqissuussisarnerit ulluni pingasunik-sisamanik sivisussuseqartarsimapput.

 

Tamatumunnga atatillugu Inatsisartut Siulittaasuat Josef Motzfeldt oqarpoq: “2011-mi inuusuttut inatsisartuinik taallugu aaqqissuussinissamut soqutiginninnginneq ajuusaarnarpoq, taamaattumillu neriuutigeqaara taamatut aaqqissuussisarnerup ilusiata allanngortinneqalaarneratigut inuusuttut inatsisartuinik taallugu aaqqissuussisarnerit soqutigineqaqqinneqalerlutillu nukittorsarneqassasut.”

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuannut Josef Motzfeldtimut angallattagaq mobil +299 55 76 41 saaffiginnilluni pissarsiarineqarsinnaapput.

 
 
Sidst redigeret af: (09 jan 2014 06:34)